Tumhari Yaad !!

Aaj bahut dino baad, tumhari yaad aayi.

Tumse mil paana munasib nahi so tumhara facebook khola, fir Instagram aur fir YouTube.

Jab dil nahi bhara to fir WhatsApp bhi check kar daala.

Kuchh waqt ho chala hai tumse baat kiye so kaafi scroll karna pada.

Hamari conversation ki har line ne saari yaadein taaza kar di.

Aisa laga mano tum mere samne hi baithi ho.

Padhne ko to bahut kuchh tha par 2017 ki sardiyon pe kuchh jyada hi atak gaya main.

Wo chats khud ko email kar di hain ke roj thoda padh sakoon,

Aur roj mil sakoon tumse, thoda-thoda.

- Inspired from a few lines of ’Meri Pyaari Bindu,’ a movie which is very close to my heart. My guilty pleasure, if you will.

Ehsaas

Kaam mein kuchh jyada hi mashgool tha pichhle kuchh dino se,

Par aaj thodi fursat mili to ye ehsaas hua,

Ke tere saath hone ya na hone se mujhe koi fark nahi padta.

Kuchh honge jinhe gulabi galon se reshmi baal hatane aur apne mehboob ki aankhon mein kho jaane ki aadat hogi.

Par tere liye mera pyaar kabhi jismani to tha bhi nahi.

Ye to bas tera saath hone ka ehsaas tha.

Ke main duniya se ladd jaata tha teri khatir,

Aur jab kabhi thak jaata to tu hamesha paas hoti thi apne seene se lagane ke liye.

Ye ek ehsaas hi to tha ke jab tu khil khila ke hansti to lagta tha mano maine duniya mein sab kuchh haasil kar liya ho.

Kuchh arsa ho chala hai abb inn yaadon ko,

Aur dhire dhire wo ehsaas kahin gayab ho raha hai.

Sochta hoon ke uss ehsaas ke khatam hone ke baad main zinda bhi rahunga ke nahi !!